Planvoludi amics e amigues,
En prumèr lòc voi, a toti es que non è auut era oportunitat de saludar-vos encara, hèr-vos arribar es mèns milhors desirs en aguest an 2014, que demori sigue plen d’èxits tà vosati e es vòsti.
Com sabetz, en aguesti darrèri mesi es eveniments politics en Catalunya an estat plan intensi e complèxes. En sens des comissions executiva e delegada d’Unitat d’Aran, auem reflexionat e debatut prigondament sus aguesti ahèrs, e, ena assemblada de militants deth passat dia 28 de gèr, sosmeterem ara valoracion dera militància aguestes reflexions, entà que, s’atau se consideraue oportun, se prenessen coma eth posicionament d’Unitat d’Aran respècte era situacion actuau. Atau donc, vos hèsqui a arribar es punts qu’expliquen aguest posicionament, un posicionament que coma digui, a estat ratificat pera militància ena assemblada abantes nomentada:
- Unitat d’Aran a estat, e ei, a favor deth dret a decidir democraticament eth futur des relacions de Catalonha e Espanha, dera madeisha manèra que defense que Aran a de poder hèr çò de madeish en moment que se plantege un referèndum o ua consulta tà hè’c possible.
- Era posicion d’Unitat d’Aran en aguest ahèr ei era de demanar ua consulta que sigue “acordada e legau”, per’mor que, de non èster atau mès enlà dera sua invalidesa, sonque servirà com ua estratègia tà unes eleccions plesbiscitàries que seran un frau democratic e ua excusa tà portar a tèrme ua declaracion unilaterau d’independéncia, que non volem.
- Er objècte d’Unitat d’Aran com a organizacion politica ei era preservacion dera singularitat e des elements definidors d’Aran: era sua lengua, es sues institucions e era sua istòria. E ei en aguest objectiu que centram es nòsti esfòrci tà esvitar que, en tot aguest procès, Aran acabe diluït en debat identitari catalan, sense que sigue respectada era sua singularitat e eth sòn dret a exercir era sua volentat democratica deuant des futurs scenaris politics.
Atau donc demori ara vòsta disposicion entà parlar d’aguest o d’auti ahèrs que siguen deth vòste interés e vos saludi plan coraument,
Paco Boya
Secretari Generau