Eth besonh dera nòsta organizacion entà contactar damb er entorn  sociau, mos hè a pensar en un modèl organizatiu agil e qu´age coma objectiu fomentar era participacion de militants e simpatizants enes debats politics e era vida intèrna deth partit. Es objectius dera nòsta organizacion entàs pròplèus quate ans son:

–          Dotar-mos de mecanismes agils de participacion.

–          Èster presenti en toti es domenis deth nòste entorn entà mantier un estret contacte damb era societat deth nòste país.

–          Facilitar ath maxim era participacion des militants e simpatizants ena vida politica d´Aran e Catalonha.

Ei per aguest motiu que proposam quauques modificacions ena estructura intèrna:

ETH CONGRÈS NACIONAU

Eth Congrès ei eth maxim organ deth Partit. Aurà competéncia exclusiua entà establir era sua estructura intèrna, regular era sua disciplina e elaborar era sua politica e eth sòn programa.

Eth Congrès ei constituït per toti es militants deth Partit. S´amassarà damb caractèr ordinari, aumens cada quate ans, dempús dera convocatòria dera Assemblada de Militants, e damb caractèr extraordinari quan ac convòque era Comission  Executiua, era Assemblada de Militants o ben quan ac solliciten era mitat mès un des afiliats e afiliades deth Partit.

Eth Congrès aurà es següentes atribucions:

a)      Establir era estructura intèrna deth Partit e reformar, se cau, es Estatuts.

b)      Elaborar ua estratègia e era linha politica deth Partit  e eth programa de govèrn entà Aran.

c)      Decidir es relacions deth Partit damb d´auti partits e organizacions.

d)      Aprovar o refusar era gestion dera Comission Executiua.

e)      Elegir es membres dera Comission Executiua.

ETH PRESIDENT

Cau refortir era figura deth President d´Unitat d´Aran coma aglotinador e representant institucionau  deth nòste Partit.

Es sues atribucions seràn:

–          Presidir e convocar eth Congrès Nacionau e era Assemblada de Militants.

–          Presidir era Comission de Listes.

–          Es foncions de representacion Institucionau.

Eth President serà escuelhut pera majoria des militants assistents ath Congrès Nacionau.

Es Estatuts auràn de definir era forma d´eleccion deth President e era durada deth sòn mandat, mejançant ua formula que garantisque era participacion de toti es militants en aguesta decission.

ERA ASSEMBLADA  DE MILITANTS

Compausen era Assemblada de Militants e i seràn convocadi toti es militants.

S´amassarà coma minim un viatge ar an entà escotar er informe de gestion deth Secretari Generau e jos er orde deth dia signat peth President.

Era Assemblada de Militants assumirà es foncions deth Conselh Nacionau.

ERA COMISSION EXECUTIUA

Era Comission Executiua execute es acòrds deth Congrès  e dera Assemblada de Militants. Especificament son foncions dera Comission Executiua: elaborar e mantier eth cens des afiliats e afiliades deth Partit; requectar es quòtes des afiliats e afiliades; mantier relacions damb d´auti grops politics e sindicaus; nomentar un portavotz deth Partit ; editar era premsa o revistes deth Partit; organizar e fomentar era formacion des afiliats e afiliades; amiar a tèrme era administracion e gestion deth Partit, es sues finances  e patrimòni; e garantir eth foncionament regular dera organizacion deth Partit. Restarà facultada entà realizar toti es actes relacionats damb eth crèdit e era  administracion entath desvolopament des activitats deth Partit, cossent damb es decisions dera Assemblada de militants, ara quau balharà compdes.

Era Comission Executiua serà trigada peth Congrès Nacionau.

Era Comission Executiua serà compausada per:

a)      Eth President.

b)      Eth Secretari Generau.

c)      Eth Secretari  d´Organizacion.

d)      Es cargues elegits en Conselh Generau d´Aran.Tostemp qu´aguesti siguen afiliats o afiliades deth partit, en cas contrari se nomentarà entà formar part dera Comission Executiua era persona que vage darrèr sòn enes darrères listes electoraus.

e)      Era coordinadora der Airau dera Hemna d´Unitat d´Aran.

f)       Es alcaldes o caps de lista des municipis de mès de 500 abitants. Tostemp qu´aguesti siguen afiliats o afiliades deth partit, en cas contrari se nomentarà entà formar part dera Comission Executiua era persona que vage darrèr sòn enes darrères listes electoraus.

g)      Es representants des Assemblades Locaus. Seràn proposadi peth Secretari Generau, votadi en Congrès Nacionau, e ratificadi per aguestes assemblades. Se coneisheràn damb eth nòm de Coordinadors Territoriaus.

h)      Es Deputats o membres elegits en d´autes institucions. Tostemp qu´aguesti siguen afiliats o afiliades deth partit, en cas contrari se nomentarà entà formar part dera Comission Executiua era persona que vage darrèr sòn enes darrères listes electoraus.

i)        Es militants que pera sua importància sociau siguen designadi pera Executiua e ratificadi pera Assemblea de Militants.

j)        Eth representant deth Setau Terçon. Ei a díder eth representant de toti es afiliats d´Unitat d´Aran que residissen dehòra d´Aran

Es foncions sectoriaus seràn assumides pes cargues elegits en foncion des sues responsabilitats institucionaus.

Quinsevolh militant, o grop de militants, poirà presentar candidatures entà èster part dera Comission  Executiua. Ac poiràn hèr en Candidatures barrades o individuaument entà prepausar-se coma Coordinador Territoriau.

Era sua participacion enes organs resultants serà proporcionau as resultats obtengudi ena votacion.

ES ASSEMBLADES LOCAUS

Son es organs qu´amassen es militants e simpatizants des pòbles d´Aran. S´amassaràn  periodicament,  coma maxim un viatge per semèstre, mès poiràn èster convocades quan era Comission Executiua o es Coordinadors Territoriaus d´aguestes assemblades ac consideren oportun. Tanben poiràn èster convocades a demana des militants.

Es Assemblades auràn foncions de debat, assessorament, mobilizacion e composicion e ratificacion de listes electoraus locaus.

Era Comission Executiua s´amassarà coma minim un viatge ar an damb cadua des Assemblades Locaus.

Es cargues elegits informaràn dera sua gestion deuant des Assemblades Locaus damb ua periodicitat inferiora as sies mesi.

En cas d´oportunitat politica o demana dera Comission Executiua, o des militants, es Assemblades Locaus d´un Terçon poiràn, jos era denominacion d´ Assemblada de Terçon,  abordar aqueres questions que les afècten coma territòri.

ERA COMISSION DE LISTES

Serà presidida peth President deth Partit.

Era Comission de Listes serà era encargada de confeccionar es listes electoraus d´Unitat d´Aran. Aguesta Comission serà formada peth President, peth Secretari Generau,  peth Secretari d´Organizacion, e pes Coordinadors Territoriaus.

Era Comission de Listes serà creada aumens un an abantes des eleccions, e aurà de sajar de  presentar es listes ara Comission Executiua e ara Assemblada de Militants coma minim tres mesi abantes des eleccions, entà qu´aguesti les apròven. Es membres dera  Comission de Listes passaràn a èster membres deth Comitat de Campanha un viatge en periòde electorau, e eth son trebalh començarà en moment qu´es listes proposades siguen aprovades.

Era aprobacion d´aguest document entraïnarà era modificacion des Estatuts d´UNITAT d´ARAN,  en çò que tanh ara organizacion. Posteriorament se harà a arribar a toti es militants damb eth nau redactat.