Era Votz destacada: Miguel Almansa Calzado
D’Unitat d’Aran estant, volem encetar aguest nau espaci, en tot parlar e rebrembar ath companh Miguel Almansa Calzado, qu’ath long dera sua vida, sonque dèc mòstres de generositat e preocupacion sociau.
En son ua bona mòstra dues accions molt concretes dera sua trajectòria professionau. Enes ans 50, un laueg deishèc isolada ara Val d’Aran pendent quauqui dies, e en aquera situacion es medicaments comencèren a escassejar. Miguel Almansa viatgèc enquia Bilbao damb eth sòn coche particular, e damb ues vies de comunicacion insufisentes e maumerentes en aquera epòca, tornèc damb medicaments sufisents entà Aran, en un viatge long d’un solet dia.
Com volgue, en aquera epòca i auie fòrça casi de Fèbre de Malta (brucelòsi), fòrça viatges dificil de diagnosticar. Almansa, qu’acompanhaue as mètges en tot amiar a tèrme es analisis corresponentes in situ, e poder començar atau eth tractament de forma rápida en tot sauvar a persones e bestiar.
Eth sòn prètzhèt coma farmacèutic siguec reconeishut pera Generalitat de Catalunya en tot autrejar-li era medalha Josep Trueta ath mèrit sanitari en 2013. Atau madeish, eth Conselh Generau d’Aran tanben li autregèc era Medalha d’Òr dera Val d’Aran eth 17 de junh de 2014.
Ena sua preocupacion peth benèster des aranesi e araneses ath long dera sua vida professionau e damb era sua conciéncia sociau, tant lèu artenhec era sua jubilacion, se higec ath projècte politic d’Unitat d’Aran, en tot préner responsabilitats concretes coma Conselhèr deth Conselh Generau d’Aran.
Miguel Almansa Calzado a estat e tostemps serà un referent entara societat aranesa e entàs militants d’Unitat d’Aran, un exèmple de fidelitat e entrèga ath partit e ara prosperitat d’Aran, damb ua vida dedicada ath progrés sociau, politic e economic e der autogovèrn dera Val d’Aran, e dera sua maxima institucion, eth Conselh Generau d’Aran.
Volem remercar era fermesa des sues conviccions, e peth dessús de tot, era sua fidelitat sense henerècles, especiauments enes moments mès dificils e comprometudi entath Partit e entà Aran, tostemps damb optimisme e sense defalhiment.