Ei per aquerò que des d’UA volem méter en valor eth compromís de totes es persones que desinteressadament trebalhen pera sua comunautat e es sòns vesins, a favor d’ua societat mès equilibrada, mès participativa, mès transparenta. UA vò representar e èster ath cant de totes eres ena sua luta per un futur mielhor ena nòsta Val.
Unitat d’Aran a hèt un pas entà dauant dera man des joeni. Mos proposam daurir-mos mès ara societat entà qu’ eth partit se convertisque e se consolide coma eth referent dera gent d’aguest país que vò qu’Aran age lideratge territoriau, ambicion nacionau e progrès economic damb equitat sociau, objectius aguesti qu’eth govèrn conservador de CDA en Conselh Generau a enterrat definitivament, coma demòstren es sòns prumèrs 100 dies de camin.
Era nòsta societat passe per un moment de dificultat, non sonque en aquerò que tanh ara economia, senon tanben ara morau, a çò qu’ei public, politic, per tant. Es fòrces conservadores qu’aué mos govèrnen non resòlven, mès ben contribuïssen ath trincament sociau e ath descrèdit dera politica, donques sense cap tipe de prioritat ne huelha de rota, an iniciat ua politica de retalhades indiscriminades en servicis tant essenciaus coma era sanitat e en politiques de futur tan nucleares com era educacion publica.
Dauant aguest estat de causes, non mos podem resignar e auem er enorme rèpte d’aufrir ua alternativa credibla, basada en un projècte d’austeritat, mès que sigue capaç d’incentivar era economia des dera innovacion e eth coneishement, per tant, damb mès e mielhor educacion publica, damb mès e mielhores esturments estrategics ath servici d’un modèl economic intelligent e responsable sociaument. Aqura ei era clau.
Ath delà, auem era oportunitat de deféner es nòsti interèssi, e es deth conjunt dera província, s’es ciudadans autregen era sua confiança as listes deth PSC enes pròplèu eleccions deth 20 de noveme, enes quaus è er aunor d’entestar era candidatura entath Senat. Deféner as nòsti ciutadans signifique apostar clarament pera educacion publica e per mantier eth nivèu d’inversion ena nòsta sanitat, e hèr des nòstes tèrres un exemple viu d’ innovacion e coneishement que sonque es nòsti joeni son capaci d’amiar entà deuant, coma mos demòstren projèctes tan significatius coma eth Parc Scientific e Tecnologic Agroalimentari de Lhèida.
Entà recuperar era confiança, auem de besonh que nosati, es responsables publics, confiem mès enes ciutadans, enes sues capacitats e en sòn potenciau, mès entad aquerò ei fondamentau auer un projècte clar, ua rota que priorize era educacion e eth foment der emplec sense menspredar eth lideratge que li correspon ara administracion publica, e dera quau era dreta desconfie deliberadament.
Es reformes son de besonh mès, mès important ei saber entà on mos amien, entà quin modèl de societat volem anar, e era mia opcion, e era de tanti, ei era d’ua societat mès creativa e comprometuda damb es qu’aué passen serioses dificultats. Non talhem es ales as qu’aué pòden aportar molt ath progrès de toti e totes. Ei era nòsta opcion, eth nòste rèpte de futur.