En transcurs dera inauguracion, eth sindic d’Aran, Francés Boya, a remercat eth besonh de prebotjar era innovacion en encastres coma era Val d’Aran, “pr’amor que non i a activitat toristica que non se base ena qualitat per miei dera innovacion”. De hèt, “s’era qualitat ei eth marc entà desvolopar es empreses toristiques, er aute èish vertebrador ei era innovacion, er objectiu estrategic fonamentau entà quinsevolh empresa que vò competir”.
Eth Sindic a manifestat qu’era temporada d’iuèrn “a estat plan bona en comparacion as precedentes”, mès a avertit “des rèptes que vien coma eth cambi climatic e es cambis de tendéncies en sector que cau saber abordar damb innovacion, competitivitat e melhora dera qualitat deth producte toristic”. En aguest sens, a encoratjat as empreses entà adoptar estratègies de foment dera innovacion e a declarat que “eth Conselh Generau, laguens des sues competéncies, a començat a premanir un plan estrategic entath torisme damb er objectiu de desestacionalizar era activitat e fomentar era innovacion, era promocion, era qualitat, era diferenciacion e era competitivitat”.