Unitat d’Aran 42 ans d’ençà dera sua formacion. Quate decades d’istòria e defensa dera volontat d’èster d’Aran, de persutar entà conservar es institucions e tradicions pròpries, era tèrra e era cultura, lengua e identitat araneses.
En tot préner eth relhèu dera Associacion es Terçons en 1979, UA iniciaue, un an dempús, eth sòn camin coma partit damb perfil politic pròpri, progressista, aranesista, municipalista e de clares conviccions ena defensa des drets nacionaus d’Aran, ena afirmacion dera sua cultura pròpria e deth sòn estatus diferenciat en Catalonha e ena volontat d’arténher ua societat mès justa e igualitària.
Totun, arren auesse estat possible sense eth compromís, trabalh, coratge e leiautat ath país des persones que, sense demorar arren a cambi, en aqueri tempsi incèrti dera fin dera dictadura, dèren un pas entà deuant e fondèren aguest partit.
Unitat d’Aran, pendent aguesti 42 ans d’existéncia a estat tostemp ath servici dera Val d’Aran e era sua gent. A trauès dera incansable luta de totes es persones qu’an format e formen part d’aguest partit politic, s’a artenhut era possibilitat de recuperar era maxima institucion aranesa, qu’ei eth Conselh Generau d’Aran, e damb eth, era autonomia e autogovèrn istorics deth nòste territòri. Gràcies ad aguestes persones, ath sòn esfòrç e dedicacion, s’a artenhut era aprobacion e implementacion en Aran de drets sociaus tant basics coma era sanitat, cultura, educacion o viuenda digna, entre d’auti.
Pendent quate decades, Unitat d’Aran a representat eth progrès entara Val d’Aran e, fidèus as ideaus qu’an acompanhat tostemp ath partit, es òmes e hemnes qu’actuaument trabalhen en UA ath servici des aranesi e araneses renauissen eth sòn compromís damb eth país damb era volontat decidida de seguir es passi de qui les an precedit.
Aciu traparatz es infografies que commemòren en 40 ans de vida d’UA damb tota era informacion dera sua istòria.
Tà informacion mès detalhada podetz consultar Ressenha istorica d’un partit politic.
