Eth candidat a sindic, Paco Boya, a visitat es pòbles d’Escunhau, Casarilh, Arties e Garòs. En Escunhau-Casarilh a estat acompanhat der alcaldable entà Vielha-Mijaran, Juan Riu, e es candidats numero 2 e 3 tar Ajuntament, Marc Cuny e Maria Vergés, respectivament. Atau madeish, Boya s’a desplaçat tà Arties e Garòs, a on a visitat as vesins damb eth prumèr candidat tà Naut Aran, Víctor Rodríguez, e eth candidat peth terçon d’Arties-Garòs, José Antonio Bruna (PRAG).
Rodríguez a declarat que se UA govèrne en municipi, “impulsarà un centre de dia entara gent grana de Naut Aran e collaborarà damb eth Conselh entà implantar era atencion domiciliària, pr’amor qu’ei important qu’es nòsti grani poguen demorar eth maximum de temps possible en municipi e agen un envielhiment de qualitat en casa, s’ei possible”. Ath delà, damb aguest projècte se crearien lòcs de trabalh e se mielhorarie era qualitat de vida des vesins mès grani.
