- Jos eth lèma “40 (+1) ans damb Tu” hestege tanben es 41 ans de vida deth partit, ua commemoracion que s’auie de celebrar er an passat e qu’auec de sospener-se pr’amor dera crisi sanitària.
- Maria Vergés, actuau secretària d’organizacion deth partit, a presentat era sua candidatura entara secretaria generau
Damb eth lèma “40(+1) ans damb Tu”, Unitat d’Aran celèbre dissabte 11 de deseme, eth sòn 7au Congrès Nacionau que profitarà tanben tà commemorar es 41 ans de vida deth partit, que siguec inscrit coma partit politic en hereuèr de 1980.
Entà Paco Boya, secretari generau d’UA “aguest congrès arribe en uns moments sociaus, economics e politics fòrça complèxes, mès Unitat d’Aran se presente coma un partit fòrt e capable de hèr front as rèptes qu’eth país a per endauant entàs pròplèu ans”.
Boya non repertirà ath capdauant dera secretaria generau tara que n’aguest congrès a presentat candidatura Maria Vergés, actuau secretària d’organizacion deth partit qu’a declarat que “ac hèsqui pr’amor que sò convençuda que, amassa damb es persones que m’acompanhen en aguesta candidatura, podem contunhar damb eth trabalh que pendent tot aguest temps s’a amiat a tèrme, en tot trobar naues manères de hèr politica, en tot equilibrar experiéncia e relhèu, adaptades tanben as naui rèptes e tempsi qu’arriben e que mos emplacen a trabalhar amassa entà hèr-les front”.
Acompanhen a Vergés en aguesta candidatura Amador Marqués, coma vicesecretari generau, Marc Tarrau, coma secretari d’organizacion e Paco Boya coma president. Atau madeish, Arturo Calbetó, actuau president deth partit, ocuparie eth cargue de president onorific, en reconeishement ath sòn trabalh e dedicacion a Unitat d’Aran.
Eth Congrès aurà lòc dissabte 11 de deseme, en Hotel Tuca, a compdar des 18’00o., en qué er alcalde de Vielha e Mijaran, Juan Antonio Serrano, balharà era benvenguda as assistents, e era executiva gessent, dera man deth secretari generau e secretària d’organizacion, balharà compde der informe de gestion, atau coma deth nau Document Politic e des prepauses sues era naua Comission Executiva.
A comdpar des 20’00o, s’amiarà a tèrme era clausura, damb era participacion de Miguel Gracia, peth PSOE-Aragón, Ramon Espadaler, per Units per Avançar, e Salvador Illa, cap dera oposicion de Catalunya, peth PSC.
Atau madeish, se presentarà un vidèo commemoratiu deth 41 aniversari d’Unitat d’Aran.
Val d’Aran, 8 de deseme de 2021