Unitat d’Aran avalòre eth consens entà arténher ua naua lei d’Aran

UA – PNA considère qu’era naua prepausa de lei d’Aran pòt devier un bon esturment ath servici dera benestança des ciutadans e es ciutadanes que demoren en Aran e que suposarà un punt d’inflexion en exercici der autogovèrn, perqué s’elève a rang de lei era reconeishença explicita dera realitat d’Aran en ensemble de Catalonha, era sua singularitat territoriau e eth blindatge des competéncies deth Conselh Generau, atau coma der establiment de naui esturments de relacion bilaterau entre eth Conselh e era Generalitat e era dotacion d’un nau modèl de finançament per miei d’un Hons de cooperacion entre es Govèrns catalan e aranés. Per aguesti motius, Unitat d’Aran emplace ara Generalitat, as Ajuntaments e ath conjunt dera societat a avalorar era ambicion e eth possibilisme d’un tèxte que pòt perméter auançar notablement en autogovèrn en benefici des ciutadans e es ciutadanes.