FRANCESC BOYA ALÓS, portavotz deth Grop Unitat d´Aran en Conselh Generau d´Aran ara
empara de çò que dispause er art. 97.3 en relacion damb er art. 91.4 deth Reiau Decret 2568/86 de 28 de noveme, Reglament d’Organizacion e Foncionament de Regim Juridic des Entitats Locaus, sosmet ara consideracion deth Plen, entath sòn debat e aprobacion, se s’escatz, era següenta
MOCION
En Aran, a on era lengua ei un des elements mès significatius que mos representen, ei primordiau garantir-ne era conservacion e, ath viatge que se´n facilite er aprenedissatge, cau facilitar-ne er us sociau.
Dempús qu’eth tèxte aprovat peth Plen deth Parlament de Catalonha sus era Prepausa de reforma der Estatut d’Autonomia de Catalonha, eth darrèr 30 de seteme de 2005, e remetut peth Congrès des Deputats ara presidéncia deth Senat eth 31 de març de 2006 nomente, en Títol Preliminar, Article 6: Era lengua pròpia e es lengües oficiaus, er aranés coma:
“Era lengua occitana, nomentada aranés en Aran, ei era lengua pròpria e oficiau d´aguest territòri e ei tanben oficiau en Catalonha, d´acòrd damb çò qu’establissen aguest Estatut e es leis de normalizacion lingüistica”.
Pr´amor qu´eth Conselh Generau d´Aran ei era unica institucion que pòt hèr un usatge quotidian e ua defensa eficaça der aranés, ei de besonh exemplificar eth compromís dera maxima institucion damb era lengua pròpia deth país fondamentant-se en principi que totes es persones que viuen e trabalhen en Aran an, atau e com explicite eth nau Estatut, eth dret e eth déuer de conéisher era lengua. Cau donques qu’en totes aqueres publicacions per miei des quaus eth Conselh Generau d´Aran s´adrece ara poblacion, er aranés age un protagonisme que lo destaque coma lengua pròpria.
Cau donques, per part deth Conselh Generau d´Aran, un critèri respècte ara utilizacion dera lengua enes publicacions oficiaus, que ja seguissen determinadi ajuntaments dera Val.
Per tot açò argumentat, proposam ath Plen deth Conselh Generau d´Aran era adopcion deth següent
ACÒRD
1. Qu’eth Conselh Generau d´Aran age coma unica lengua er aranés enes sues comunicacions e publicacions, a exceptat d’aquerò que mèrque era legislacion vigenta o çò que pogue èster sollicitat per un collectiu o particular ena defensa des sòns drets.
Aran, 12 d´abriu de 2006.
Francesc X. Boya
Conselhèr