Unitat d’Aran a demanat ara maxima institucion aranesa pera ocupacion dera residéncia en tot mostrar era sua inquietud pera manca de places dera madeisha.
Pendent aguesti darrèri dies, Unitat d’Aran a entrat diuèrses preguntes per escrit en Conselh Generau tà conéisher er estat actuau dera Residéncia Sant Antòni dera tresau edat. Aguestes preguntes son adreçades, entre d’auti ahèrs, a conéisher er estat actuau d’ocupacion d’aguest equipament e quin ei eth temps de demora, atau coma eth nombre de persones que i a pendentes d’ingressar-i. “I a fòrça dera nòsta gent grana qu’a auut de marchar tà residéncies de dehòra dera Val per manca de lòc”, ditz Francés Boya, Conselhèr pòrtaveu d’UA. “Aguest hèt compòrte dificultats tàs familhes que, ath delà de non auer apròp as sòns familhars, an ues despenes mès nautes, problèmes de transpòrt…”, higie Boya.
D’ençà dera ampliacion que portèc a tèrme eth govèrn d’Unitat d’Aran en 2010, non s’a tornat a hèr cap inversion tà poder incrementar eth numerò de places ena residéncia Sant Antòni, tot e qu’era poblacion d’Aran age anat envielhint, e tot açò “pr’amor dera inactivitat deth govèrn de Convergéncia Democratica Aranesa, que non a amiat entà deuant era ampliacion der Espitau de Vielha, qu’auie de perméter guanhar places en aguesta residéncia, atau coma Unitat d’Aran auie iniciat”, rebrembe Boya.
Eth partit aranés tanben a preguntat ath Conselh sus es dinamiques d’accès e er autrejament de places ena residéncia. “Volem saber quini son es critèris de seleccion, s’existíssen critèris d’excepcionalitat e, en tot cas, saber quini son e s’an estat aplicadi en bèra ocasion”, explique Boya.
Aran, 22 de junhsèga de 2016