Er alcalde de Bossòst, Paco R. Miranda, òpte ara reeleccion per Unitat d’Aran damb er objectiu de “completar eth projècte municipau en favor de Bossòst”. UA l’a proclamat coma eth sòn prumèr candidat en un acte dubèrt as vesins e vesies, que s’a celebrat en Casau deth Jubilat d’aguest pòble de Quate Lòcs.
Paco R. Miranda a recebut eth supòrt deth sindic d’Aran e candidat ara reeleccion, Paco Boya, qu’a assegurat qu’er alcalde e eth sòn equip an tornat “era autoestima” a Bossòst, e a laudat es valors qu’encarne Miranda, coma er esfòrç, era constància, era umilitat e era discrecion. “Miranda ei un aranés per pròpria volentat, encara que non age neishut en país”, a rebrembat der alcalde, neishut en Badajoz er an 1946.
Coneishut tanben pera sua dedicacion ar atletisme e es maratons, er alcalde de Bossòst a hèt un balanç exaustiu dera legislatura, en tot destacar es auanci qu’eth pòble a artenhut dera man deth sòn govèrn. Damb Miranda d’alcalde, Bossòst a podut bastir un nau pònt sus er arriu Garona e a renauit carrèrs e eth sistèma d’enlumenatge, entre d’autes accions importantes.
Ath delà, eth Parc deth Portilhon, de visualizacion dera flòra e era fauna aranesa, ei practicament acabat e en aguest ostiu ja serà en condicions entà èster visitat, segontes a anonciat eth sindic Paco Boya. Eth secretari generau d’UA a rebrembat qu’aguest projècte comencèc a desvolopar-se en an 2002 e qu’a compdar de 2004 demorec paralizat. Eth nau govèrn d’UA en Conselh Generau le reemprenec e li a dat, ara fin, er impuls definitiu entà èster aué ua realitat.
