Eth sindic e candidat d’UA a defenut “es valors, eth trabalh e era conviccion” des aranesi entà “hèr mielhor Aran entre toti”. Boya considère que cau un Pacte Sociau e Economic, basat ena Formacion, era Aliança damb es Empreses e era Proteccion Sociau “entà que arrés demore entà darrèr”. En aguest sens, a proposat era metuda en marcha d’iniciatives restacades damb eth “cooperativisme sociau”.
“Aran ei mielhor preparat entà superar era crisi, coma demòstre er hèt qu’era Val s’age convertit en dusau pòl toristic aguest iuèrn dempús des Isles Canàries”, a afirmat. Paco Boya a apostat per “ua economia que genère lòcs de trabalh” e s’a mostrat contrari a un creishement urbanistic hèt sense critèris, perque compòrte efèctes negatius contra era economia deth país.
Eth candidat ara reeleccion, qu’a mostrat eth sòn compromís pera “participacion, era transparéncia e era onestetat”, a estat acompanhat, en transcurs der acte, per cinc ciutadans independents dera Val d’Aran qu’an dath a conéisher eth sòn punt d’enguarda sus eth present e eth futur d’Aran.
