- Era militància d’UA a escuelhut a Vergés pendent eth 7au Congrès deth partit celebrat aué a on tanben s’an trigat es cargues tara vicesecretaria generau, presidéncia e secretaria d’organizacion que seran ostentadi per Amador Marqués, Paco Boya e Marc Tarrau respectivament, atau coma era rèsta de membres dera Comission Executiva tàs pròplèu quate ans
- A prenut part en acte de clausura Salvador Illa, actuau secretari d’organizacion deth PSC e cap dera oposicion en Catalunya
Aué s’a amiat a tèrme eth 7au Congrès Nacionau d’Unitat d’Aran que amb eth lèma “40(+1) ans damb Tu”, a profitat tanben tà commemorar es 41 ans de vida deth partit, que siguec inscrit coma partit politic en hereuèr de 1980. D’alavetz ençà, en tot mantier er esperit de defensa dera tèrra, des institucions pròpries e dera recuperacion der autogovèrn aranés e préner eth relhèu dera Associacion es Terçons en 1979 iniciaue eth sòn camin coma partit damb perfil politic pròpri, progressista, aranesista, municipalista e de clares conviccions ena defensa des drets nacionaus d’Aran, ena afirmacion dera sua cultura pròpria e deth sòn estatus politic diferenciat en Catalunya e ena volontat d’arténher ua societat mès justa e igualitària.
En aguest 7au Congrès, era militància d’Unitat d’Aran a escuelhut era candidatura presentada per Maria Vergés entà ocupar era secretaria generau deth partit, enquia ara ocupada per Paco Boya. Aguesta candidatura segontes a declarat Vergés “represente ua naua etapa en Unitat d’Aran en tot conjugar era experiéncia e eth relhèu, que mos a de perméter seguir damb eth trabalh que pendent tot aguest temps s’a amiat a tèrme, en tot trobar naues manères de hèr politica que mos ajuden a hèr front as naui rèptes e tempsi qu’arriben e que mos emplacen a trabalhar amassa, uns rèptes tàs qu’Unitat d’Aran ei prèsta tà afrontar damb garanties”.
Pendent er acte, Paco Boya, secretari generau gessent e escuelhut coma president deth partit, a destacat que “Unitat d’Aran a auut tostemps en sòn adn era vocacion e era volentat d’èster un partit de govèrn, un partit de transformacion dera societat e des sòns contextes tà per’mor de milhorar era qualitat de vida des vesins e vesies deth nòste país” e higie que “damb aguesta naua executiva aguesta vocacion e volentat se ve renauida e reforçada”.
Ath delà de Boya, an estat designadi Amador Marqués, alcalde de Bossòst, coma vicesecretari generau, Marc Tarrau, president dera EMD de Bagergue coma secretari d’organizacion e Arturo Calbetó, actuau president deth partit, coma president onorific, en reconeishement ath sòn trabalh e dedicacion a Unitat d’Aran. Atau madeish, pendent er acte, era militància a volut hèr un reconeishement explicit a Calbetó en arregraïment ara sua dedicacion e trabalh peth partit e pera Val d’Aran, qui siguec membre fondador d’UA e a estat tostemp ath capdauant deth partit.
Entà commemorar eth 41 aniversari deth partit, s’a presentat un vidèo entà celebrar aguesta hita e s’a hèt entrèga d’un present commemoratiu ad aqueri militants e militantes qu’an format part d’UA des sòns inicis ençà.
Pendent eth congrès era executiva gessent a presentat er informe de gestion d’aguesti darrèri cinc ans atau coma eth document politic que mèrque es linhes estrategiques e objectius politics deth partit tàs pròplèu ans, qu’an estat aprovadi per unanimitat.