Era Val d’Aran a dat passi decisius entà arténher un futur mès sostenible, en tot trabalhar en desvolopament de projèctes de bioeconomia e transicion energetica. Aguesti consoliden eth compromís deth territòri damb era gestion responsabla des recorsi e eth desvolopament territoriau, sociau e economic sostenible.
Bòsc Aran, se presente coma una iniciativa innovadora que cerque recuperar e preservar es bòsqui ath viatge que fomente era economia locau.
Aguest projècte ei un prumèr pas entà consolidar era bioeconomia entara diversificacion deth modèl socioeconomic d’Aran.
QUÉ EI BÒSCARAN?
BòscAran ei ua iniciativa impulsada peth govèrn d’Unitat d’Aran en Conselh Generau d’Aran, qu’a coma objectiu principau ua gestion forestau sostenible entara melhora e conservacion des ecosistèmes forestaus dera Val d’Aran.
Aguest projècte compde damb ua inversion de 1,2 milions de euròs, finançat pera Fundación Biodiversidad a trauès deth Ministerio de Transición Ecológica deth Gobierno de España.
“BòscAran perseguís era creacion d’un modèl de desvolopament rurau que permete as comunautats locaus beneficiar-se economicaments dera gestion des sòns pròpris recorsi naturaus, sense comprométer eth sòn futur.”
RECUPERACION DE BÒSQUI E ADAPTACION ATH CAMBI CLIMATIC
Un des grani rèptes mediambientaus as qu’a de hèr front era Val d’Aran ei er impacte qu’eth cambi climatic cause e causarà en territòri, coma es nautes temperatures, era manca d’aigua e era proliferacion des plagues coma era Heterobasidion annosum, que dejà afècte ara salut des bòsqui e poderie auer conseqüéncies fòrça negatives entara fauna e flòra aranesi.
“BòscAran se centre ena restauracion ecologica des bòsqui, especiauments en airaus que pòden èster vulnerables ad aguesti factors causats peth cambi climatic”.
FOMENT DERA ECONOMIA LOCAU
Mès enlà dera guardada ambientau, eth projècte BòscAran a tanben un biais economic, que cerque generar oportunitats en territòri, atau coma naui lòcs de trabalh e activitat economica. Era gestion des recorsi forestaus pòden èster ua hònt d’ingrèssi, mès tostemp jós eth principi dera sostenibilitat. Aguesti recorsi que mos balhen es nòsti bòsqui pòt convertir-se en ua oportunitat entà prebotjar e diversificar era bioeconomia d’Aran ath viatge que melhore era qualitat des ecosistèmes.
UN FUTUR SOSTENIBLE
D’Unitat d’Aran estant, apostam pera conservacion deth miei ambient en tot fomentar e impulsar un modèu de desvolopament rurau innovador e sostenible, que promò era coesion sociau e era generacion d’oportunitats en territòri, a trauès de prrojèctes coma BòscAran.
Aguest, demòstre qu’ei possible e imprescindible armonizar era proteccion dera natura damb er impuls dera economia locau, entà crear un equilibri ena preservacion deth paisatge, e era melhora dera qualitat de vida des sòns ciutadans, en tot plaçar as aranesi en centre des politiques. Era sostenibilitat laguens de toti es sòns encastres, ambientau, territoriau, sociau e economic.