Unitat d’Aran a proclamat a Víctor Rodríguez, mès coneishut coma Lolo, coma eth sòn prumèr candidat entàs pròplèu eleccions municipaus en Naut Aran. En un acte dubèrt qu’a agut lòc ena sala sociau de Salardú, Rodríguez s’a presentat as ciutadans deth municipi damb un projècte solid, en positiu e de cambi de modèl en favor deth progrès e eth benèster de toti es vesins e vesies de Naut Aran.
Víctor Rodríguez, ostalèr e restaurador de 40 ans, a defenut “ua gestion municipau que priorize es problèmes reaus dera gent” e a apostat per “cambiar er actuau modèl de creishement basat ena construccion massiva e especulativa”. “Eth nòste modèl non ei Val de Ruda”, a precisat. Entà Rodríguez, “cau méter en practica ua economia sostenibla, que cree lòcs de trabalh e potencie eth torisme pendent tot er an”.
Pr’amor d’açò, propòse “politiques comprometudes damb es empreses, eth comèrç e es empreses qu’apòsten per desestacionalizar eth torisme, en tot recuperar eth torisme familiar, de montanha e aventura, er esportiu, eth de fires e congrèssi”.
Eth sindic d’Aran e candidat ara reeleccion per UA, Paco Boya, a acompanhat a Rodríguez, e a profitat entà deféner que “es politics an de saber escotar e èster mès umils”. Boya a coïncidit en que “non se tracte de plantejar un cambi de cicle politic, senon de hèr possible un cambi de modèl de país e municipi ath servici de toti es vesins e vesies, independentament d’a qui agen votat”.
“Voi tornar-le ath pòble aquerò que m’a dat, perque es causes mès importantes dera mia vida m’an passat aciu”, a assegurat eth candidat municipau, naturau de Barcelona e vengut tara Val en 1987, a on a exercit de socorriste pendent 11 ans en Baquèira – Beret. D’ençà deth naishement deth sòn prumèr hilh, s’a dedicat en exclusiva ara empresa familiar. Lolo destaque pera sua implicacion ena vida sociau deth pòble, en tot auer estat president dera AMPA de Salardú e membre responsable dera Comission de Hèstes.
