Era secretària d’Organizacion d’Unitat d’Aran e excap de Cultura e Politica Lingüistica deth Conselh Generau d’Aran, Maria Vergés, a defenut aué eth modèl d’immersion lingüistica en aranés ena escòla dauant dera senténcia deth Tribunau Suprèm qu’anulle dus articles deth decrèt dera Generalitat sus er usatge dera lengua ena educacion infantila.
“Eth nòste modèl ei e a de seguir estant eth der aranés coma lengua veïculara, perque er aranés ei era lengua pròpria d’Aran e era mès febla e perque aguest modèl a estat un exit a favor dera conviuença sociau, era cooficialitat des lengües, er enriquiment culturau e era formacion lingüistica d’ençà des prumères edats”, a explicat.