FRANCESC BOYA ALÓS, portavotz deth Grop d’Unitat d’Aran en Conselh Generau d´Aran e EMILI SANLLEHY MEYA, Portavotz deth PRAG, ara empara de çò que dispause er art. 97.3 en relacion damb er art. 91.4 deth Reiau Decret 2568/86 de 28 de noveme, Reglament d’Organizacion e Foncionament de Regim Juridic des Entitats Locaus, sosmeten ara consideracion deth Plen, entath sòn debat e aprovacion, se s’escatz, era següenta
MOCION
Definim païsatge coma quinsevolh airau qu’includís autant es aspèctes naturaus coma es modeladi per òme e qu’an un reflèxe visuau en espaci. Ei a díder, eth païsatge resulte dera conjoncion dera dinamica deth mèdi naturau e dera gestion deth madeish amiada a tèrme per èster uman ath long deth temps. Se tracte dera manifestacion mès evidenta deth territòri.
Era grana transformacion socioeconomica qu’a patit era Val d’Aran ath long des darrèrs trenta ans a produsit importants cambis en païsatge a ua velocitat fòrça considerabla. Aguesti cambis an comportat, entre d’auti efèctes, ua estenuda desmesurada e pòc ordenada dera urbanizacion deth solèr.
Ei de besonh tier en compde er interès public deth païsatge, autant en sòn àmbit culturau, ecologic, ambientau e sociau. Aguest recors ei un component basic deth patrimòni naturau, culturau e istoric dera Val d’Aran, que contribuís ath benestar des que la gaudissen. Ath delà, resulte un element identitari de gran valor pr’amor que permet establir vincles entre er individu e eth territòri.
Era gestion deth païsatge a d’orientar-se ara conservacion e mantenement des aspèctes significatius e caracteristics dera Val d’Aran, conseqüéncia dera sua configuracion naturau e activitat umana tradicionau. Ei de besonh gestionar alavetz des d’ua perspectiva de desvolopament sostenible, entà garantizar eth mantenement constant deth paisatge e amiar e
armonizar es cambis costadi pera conjoncion des procèssi sociaus, economics e ambientaus que faussegen eth païsatge (auanç deth bòsc e matàs a còsta des prats, bastisses en solèr rurau, abandon de peisheus e trabalhs de dalh damb era conseqüenta pèrta de valor estetica, colonizacion per mates e èrbes de ribèra es lhets d’arrius en tot pèrder visibilitat e atractiu, sustitucion dera antropizacion rurau deth païsatge per ua auta de caractèr toristic…).
Es dus grani esturments damb es que se compde entà garantir aguesta gestion son era Lei deth Païsatge (Llei 8/2005 de 8 de juny de Protecció, gestió i ordenació del Paisatge) e eth Convèni Europèu deth Païsatge (Floréncia, 2000), eth quau prebotge politiques de païsatge e plantege eth besonh de protegir, ordenar e gestionar es païsatges d’Euròpa des d´era corresponsabilitat de toti es agents deth territòri e der ensem dera ciutadania.
Atau donques, un viatge argumentadi eth valor e eth pes especific deth païsatge laguens der encastre dera Val d’Aran, s’amie a tèrme era prepausa que seguís:
PREPAUSA D´ACÒRD
1.- Redaccion deth Catalòg deth Païsatge d’Aran, entenut (segontes definís era Lei deth Païsatge, Llei 8/2005 de 8 de juny de Protecció, gestió i ordenació del Païsatge), coma eth document de caractèr descriptiu e prospectiu que determine era tipologia des diuèrsi païsatges, n’identifique es sòns valors e eth sòn estat de conservacion e ne prepause es objectius de qualitat a complir.
Es contenguts minims qu’an de formar part d’aguest Catalòg, en tot seguir es indicacions dera Lei deth Païsatge (Llei 8/2005 de 8 de juny de Protecció, gestió i ordenació del Païsatge), son:
” Er inventari des valors païsatgistiques presentes en airau que correspon.
” Alistament des activitats e des procèssi qu’incidissen o an incidit de forma mès evidenta ena configuracion actuau deth païsatge.
” Era indicacion des principaus recorruts e airaus desde es que se percep eth païsatge (conquèst visuau…).
” Era delimitacion des unitats de païsatge coerentes sus es que sigue d’aplicacion un regim especific de proteccion, gestion o ordenacion, segontes es tèrmes qu’establís er article 6 dera nomentada Lei deth Païsatge.
” Era definicion des objectius de qualitat païsatgistica entà cada unitat de païsatge
” Era prepausa de mesures e accions de besonh entà arténher es objectius de qualitat païsatgistica.
2.- Amiada a tèrme, amassa damb es Ajuntaments dera Val d’Aran, dera redaccion dera Carta deth Païsatge, en tot enténer coma Carta deth Païsatge eth document qu’actue coma esturment de concertacion d’estratègies entre es agents publics e es privadi entà acomplir actuacions de proteccion, gestion e ordenacion deth païsatge qu’agen per objectiu mantier-ne es sues valors.
Aran, 10 d´abriu deth 2006.
Francesc X. Boya Alós Emili Sanllehy Meya
Conselhèr Conselhèr