Eth nòste projècte ei Aran. Aran ès tu

Unitat d’Aran se caracterize sustot pera sua defensa entà “apropar es béns sociaus, eth trabalh, era educacion, era sanitat e ua casa digna entà toti es abitants d’Aran”, atau coma entà “establir un creishement ordenat e racionau, en tot corregir es desequilibris sectoriaus e territoriaus”. Ara fin, se tracte de “hèr d’Aran ua tèrra dubèrta e integradora de toti aqueri que aciu viuen e trabalhen”. Coma se pòt comprovar, aguesti principis fondacionaus son deth tot vigents entà bastir era societat auançada que toti e totes volem.

Unitat d’Aran a estat e ei un partit dubèrt a toti, que priorize es persones e es inquietuds de cada un des ciutadans. Èm un partit optimista, que pense qu’un futur mielhor ei tostemp possible. En aguesti trenta ans de vida, UA a aufrit ara societat aranesa aunestedat provada ath servici deth pòble damb capacitat de gestion quan es ciutadans mos an balhat confidança.

Toti es partits diden que vòlen èster ath servici deth pòble. Unitat d’Aran tanben ac afirme. Mès nosati volem anar fòrça mès enlà: volem cambiar es causes, volem bastir un Aran mès just, mès equilibrat, en tot cercar eth maximom consens possible qu’afavorisque era permanéncia des transformacions sociaus emprenudes.

Unitat d’Aran artenh es trenta ans damb plan bona salut politica. UA entèste era sindicatura d’Aran e eth govèrn deth Conselh Generau d’Aran, ei era prumèra fòrça politica en Vielha – Mijaran, govèrne en Bossòst, Les e Canejan e enes pedanies de Casau, Unha, Bagergue, Arròs e Vila, Aubèrt e Betlan (en tot compdar Mont e Montcorbau), e represente as aranesi ena Deputacion de Lleida e en Parlament de Catalonha.

Quan tot açò passe, pensam qu’eth país non serie tot çò qu’ei se Unitat d’Aran non auesse estat present ena vida publica des aranesi. Era democràcia non aurie superat cèrti vicis eretats de d’auti tempsi e es nòstes
institucions d’autogovèrn serien, possiblament, en un estat embrionari.

Per aquerò volem reivindicar un còp mès era nobla e nauta foncion des partits politics e des persones que les representen, sustot des qu’exercissen cargues de responsabilitat publica, quan aguesta responsabilitat ei exercida damb aunestedat, renóncia e sacrifici dera pròpria vida personau e aufrida en autar deth ben comun. Cau maufidar-se d’aqueri que mauparlen dera politica e es politics en generau. Tot soent, darrèr d’aguestes critiques generalistes s’i amaguen interèssi personaus e posicions egoistes e insolidàries.

En tot arregrair era fidelitat e era entrega des militants e es cargues directius que mos an precedit, demoram qu’es generacions que vien poguen hestejar es pròplèu ans ath servici deth pòble e entà seguir hènt d’UA un partit dubèrt e transversau que sap acuélher totes es sensibilitats identitàries e es procedéncies sociaus a favor dera fòrça dera unitat deth pòble aranés.

 

ARTURO CALBETÓ, PRESIDENT D’UNITAT D’ARAN, e FRANCÉS X. BOYA, SECRETARI GENERAU D’UNITAT D’ARAN