Eth nòste projècte ei Aran. Aran ès tu

Francés Boya propòse un Pacte Sociau entà fomentar era economia e eth trabalh.

Eth sindic d’Aran, Francés Boya, a proposat ara societat aranesa un Pacte Sociau entà fomentar era Economia e eth Trabalh. “Mos cau conjurar entre toti entà qu’era nòsta obsession sigue generar lòcs de trabalh e promòir mès riquesa e creishement economic”, a manifestat ath long dera conferéncia Aran, projècte e futur, qu’a prononciat aguesta setmana entà balhar compde dera legislatura 2007 – 2011.

Segontes eth sindic, aguest compromís sociau se base en tres èishi: 1) Eth supòrt as joeni e as naui emprenedors, per miei de projèctes coma eth Centre d’Innovacion Empresariau dera Val d’Aran, qu’eth Govèrn aranés bastís en pòble de Casau; 2) era apòsta per un Pacte Estrategic damb es Empreses; e 3) mès esfòrci pera innovacion e era formacion. Respècte d’aguest darrèr apartat, Boya a anonciat qu’eth Conselh Generau daurirà en brèu un Centre de Formacion Ocupacionau entàs persones trabalhadores, en actiu o en caumatge.

Eth sindic d’Aran a mostrat era sua “indignacion” per estat dera carretèra N-230, entre Vielha e eth tunèl. Boya a rebrembat qu’eth Ministèri de Foment ja compde damb un projècte executiu e que sonque mancarie qu’era Comission Bilaterau Estat – Generalitat dèsse lum vèrda ad aguestes òbres “inajornables”, d’acòrd damb es inversions que s’an de realizar en Catalonha en matèria d’infraestructures.

Francés Boya a reclamat “arténher, quan abantes mielhor, ua naua Lei d’Aran e ua autonomia mès plea”, perque “Aran a dret a protagonizar era sua construccion nacionau”. “Non volem èster subsidiats, perque auem volentat d’èster e de projectar-mos coma pòble conscient dera sua identitat, peth dessús des discrepàncies ideologiques”, a dit.

“De viatges, ei molèsta entà Catalonha era diferéncia que represente Aran”, segontes Boya, qu’a reconeishut qu’era Lei de vegueries a estat “ua pròva de huec” e, damb eth reconeishement d’Aran, “un merit de toti”. Totun, a assegurat qu’era Val vò exercir lideratge territoriau en ensem deth Pirenèu.

Entà Boya, era Lei der occitan, aranés en Aran “non pòt significar ua renóncia ara nòsta lengua atau e coma la coneishem”. Eth sindic a advocat tanben per “renauir er aranesisme damb un nau compromís sociau, damb valors civics fòrts e mès capacitat entà solucionar, des dera proximitat, es problèmes des ciutadans”.

Hònt: Conselh Generau d’Aran