Eth nòste projècte ei Aran. Aran ès tu

Francés Boya convide a amiar a Aran entà dauant e possar eth projècte d’UA enes pròplèu mesi

Eth sindic d’Aran e secretari generau d’Unitat d’Aran, Francés Boya, a convidat per carta as militants e simpatizants entà “amiar a Aran entà dauant” e possar “entre toti” eth projècte d’UA enes pròplèu mesi.

Francés Boya se mòstre encoratjat e illusionat entà hèr a auançar Aran e guanhar eth futur per miei deth projècte que represente. “Aran e era sua gent ei eth nòste orizon: ua tèrra respectada, que vò auançar e èster capdauantèra ena promocion deth progrès sociau e economic”, segontes explique.

Entath sindic, a arribat era ora de “somar”, perque “toti e totes auem quauquarren a díder”. En aguest sens, s’a referit ar “esfòrç” qu’eth Govèrn deth país amie entà dauant, qu’a de servir entà “arténher un Aran mès fòrt e modèrn”.

Francés Boya a anonciat qu’UA ja premanís un programa marc participatiu entàs pròplèu eleccions municipaus e tath Conselh Generau. “Auem clar que sonque eth nòste projècte ei en condicions de portar eth país entàs majors quòtes d’autogovèrn e benèster, perque representam era opcion de futur e progrès entà Aran”, a precisat.

 

Carta deth sindic Francés Boya

Començam eth nau an damb ua esperança renauida. Èm conscients des dificultats economiques deth present, mès tanben èm plan encoratjadi e illusionadi entà guanhar eth futur entre toti e totes.

È eth plaser d’entestar un Govèrn solid, qu’a projècte de país e ei ath costat des persones. Un Govèrn que trabalhe coma jamès peth ben deth país e es ciutadans e ciutadanes que demoren en Aran.

Coneishetz plan ben tot er esfòrç que dedicam a favor dera salut e eth benèster, era economia e eth torisme, es infraestructures, era educacion, eth miei ambient, era cultura e er aranés e, coma non, er autogovèrn.

De hèt, Aran e era sua gent ei eth nòste orizon: ua tèrra respectada, que vò auançar e èster capdauantèra ena promocion deth progrès sociau e economic.

Eth nòste objectiu, tant en Govèrn deth Conselh Generau d’Aran coma enes ajuntaments, ei garantir era igualtat d’oportunitats e generar naues oportunitats economiques entara societat que lideram.

Pr’amor d’açò, voi adreçar-me a tu entà parlar-te deth futur, deth temps que ven e volem compartir a trauèrs deth projècte collectiu que representam. Voi compdar damb tu e damb era tua participacion indispensabla en aguest nau prètzhèt.

Ei era ora de somar, perque toti e totes auem quauquarren a díder. Ei era ora de hèr a auançar aguest país dera man des que sabem tà on vam.

En 2007, artenherem un tuc. Auem coneishut eth país e es municipis de forma àmplia e pregona. Ara, caminam de cap tà un nau tuc, perque volem arténher damb tu un Aran mès fòrt e modèrn, orgulhós deth sòn present, mès orgulhós encara deth sòn futur.

Ara, Aran entà dauant!