Francés Boya considère que “a arribat eth moment de dar pas as joeni d’Unitat d’Aran entà que representen damb dignitat es aspiracions deth país en Parlament de Catalonha”. Eth sindic a hèt aguest anonci en marc dera hèsta des 30 ans d’Unitat d’Aran, en un acte fòrça participatiu qu’a agut lòc en Passeg dera Libertat de Vielha. Mès de 150 persones s’an amassat entà hestejar er aniversari deth partit e aumentajar as militants que se presentèren enes prumères eleccions democratiques de 1979.
Eth conselhèr d’Agricultura, Alimentacion e Accion Rurau e candidat deth PSC per Lleida entàs eleccions autonomiques, Joaquim Llena, qu’ei tanben militant d’UA, a acompanhat as aranesi congregadi ena hèsta d’UA e assegurat qu’eth partit “ei un exemple per auer sabut deféner, en aguesti trenta ans, ua identitat aranesa dubèrta compatibla damb era reivindicacion d’ua societat mès justa e equilibrada sociaument”. Er acte a compdat damb es intervencions deth president d’UA, Arturo Calbetó, e eth secretari generau entre 1980 e 2004, Emilio Medan.
