Eth candidat d’Unitat d’Aran ena lista deth PSC per Lleida, Amador Marqués, a assegurat aué, en prumèr dia de campanha electorau, que “eth President Montilla ei era garantia de progrès entà Aran, perque ei eth candidat qu’a es idèes mès clares entà assegurar er hilat de proteccion sociau e desvolopar er autogovèrn aranés laguens d’ua Catalonha e ua Espanha pluraus”.
“Ua mòstra d’aguesta apòsta pera Val d’Aran ei era incorporacion de dus aranesi, Maria Vergés e jo madeish, ena candidatura deth PSC, er unic partit qu’a demostrat auer mès sensibilitat damb Aran”, a dit Marqués, entà qui “semble que i a uns auti partits que non cren ena nòsta singularitat, ja que non an plaçat a cap aranés en cap lòc destacat dera sua lista”.
Ath delà, “era fòrça des hèts de cap tara Val avalen eth projècte socialista, perque Montilla a estat eth president qu’a possat era Lei der aranés, a arrefortit era singularitat dera Val ena lei territoriau e a iniciat, amassa damb deth sindic Francés Boya, eth tràmit entà reformar era Lei deth règim especiau dera Val d’Aran”.