Eth nòste projècte ei Aran. Aran ès tu

Era Academia der Occitan se constituís deman ena Val d’Aran

Era Academia der Occitan serà un organisme representatiu der ensem des institucions lingüistiques e des institucions politiques deth territòri dera lengua d’Òc. Lo formaràn toti es conselhs regionaus der Estat Francés a on se parle er occitan, era Region deth Piemont en Itàlia, era Generalitat de Catalonha e eth Conselh Generau d’Aran. Tanben i seràn representandi es servicis d’educacion des disparions territòris, responsables der ensenhament dera lengua o en occitan, e es sectors d’activitat a on s’emplegue era lengua occitana, coma era recèrca, era edicion, era creacion artistica e literària o era premsa escrita e audiovisuala. Toti aguesti compòsen eth Conselh Plenari, de 50 membres en totau, que s’amassarà deman per prumèr viatge ena Val d’Aran pr’amor deth sòn simbolisme coma territòri qu’a hèt der occitan ua lengua oficiau tant laguens coma en ensem de Catalonha.

Era Autoritat de Regulacion Lingüistica der Occitan s’encuedarà de definir, mantíer e difóner era codificacion ortografica dera lengua, sense perjudici dera activitat d’insitucions coma er Institut d’Estudis Aranesi (IEA), que, en cas dera Val d’Aran, ei competent “entà establir e actualizar era normativa lingüistica der aranés, varianta dera lengüa d’òc parlada en Aran”, atau coma aprovèc eth Plen deth Conselh Generau eth passat 29 d’abriu de 2008. Es trabalhs dera naua autoritat dera lengua se centraràn enes encastres dera grafia, era gramatica, era lexicologia e era toponímia.