Planvoludi vesins,
Ei entà jo un plaser
e un aunor presentar-me a vosati coma candidata deth terçon de Marcatosa
per Unitat d’Aran-PSC, as pròplèu eleccions municipaus deth mes
de mai.
Mès abantes de seguir,
deishatz que vos parla un shinhau de jo: neishí en Vielha en 1973 e
de hè 3 ans viui en pòble de Mont. Sò licenciada en Farmacia pera
Universitat de Barcelona e Doctorada en Ciències Naturaus, ena especialitat
de Biotecnologia, pera Universitat de Würzburg, en Alemania. Totun,
era mia formacion academica non ei çò de mès important: dera mia
umila posicion ençà, vos voi díder ce qué ei çò que m’a empenhut
a díder: “òc, me presenti enes listes electoraus dera gent d’Unitat
dAran”. Donques: illusion, volentat de cambi e, sustot,
ganes de trabalhar pera tèrra qu’estimi.
Aqueri que me coneishetz
peth mèn mestièr de farmaceutica, sabetz que creigui que, peth dessús
de tot, èm persones que viuem ena madeisha Val e que a toti mos amien,
mès o mens, es madeishes inquietuds, es madeishes preocupacions e es
madeishi talents de progrès: qu’era Val mantengue e melhore eth sòn
paisatge e entorn, entà que pogam gaudir-ne es que viuem aciu e es
que mos visiten; qu’es servicis as ciutadans (era sanitat, eth transpòrt,
es servicis sociaus, era cultura…) siguen de qualitat; que pogam auer
tanben d’auti recorsi enes qu’emparar era nòsta economia; e en
definitiva, qu’auer qualitat de vida non sigue un luxe, se non un
dret de toti, viuegam en un pòble gran o en un de petit.
Non voi alongar-me
massa, sonque voi que sapigatz qu’aguesta decision a estat fòrça
meditada, pr’amor qu’aué en dia era politica ei fòrça complèxa.
Creigui qu’er hèt d’auer viscut en un aute país, d’auer trabalhat
en airau dera investigacion e dera salut, te balhe ua perspectiva diferenta
de coma poder afrontar es besonhs deth dia a dia, mès tot laguens d’un
clima de cooperacion damb toti. Tanben creigui qu’er hèt d’èster
ua hemna da un nau aire a segontes quines actituds agresiues que se
dan ena politica e, que creigui que nosati en nòste país petit auríem
d’esvitar, pr’amor que toti i viuem.
Pensi que se daurís
una pòrta ath cambi, a on era gent joena pogam accedir ara politica
sense auer d’amagar-mos d’arren, damb eth cap ben naut e bones intencions.
Atau poiram hèr reau era nòsta volentat de trabalhar peth país, coma
ei era mia trabalhar peth terçon de Marcatosa, en que viui e coneishi
es mancances qu’encara auem.
Sense mès voi arregraïr
que non ajatz lançat era carta sonque reber-la, e aja podut hèr vòstes
es mies inquietuts.
Fòrça gràcies.
Noelia Costa Riu