Planvoludi/es:
M’adreci a vosati/es coma candidata pes listes d’Unitat d’Aran- PSC as eleccions ath Conselh Generau d’Aran peth terçon de Castièro.
Aguest ei entà jo un gran rèpte autant professionau coma personau e, s’es ciutadans mos balhen era sua confiança, es mies responsabilitats en nau govèrn se centraràn en airau dera cultura e der ensenhament.
Era mia formacion academica s’a desvolopat en camp dera engenharia forestau, totun eth mèn compromés m’a portat a implicar-me, ath long deth temps, en diuèrses accions e associacions culturaus dera Val d’Aran. Atau madeish, era mia formacion complementària a virat ath torn dera cultura e dera lengua, en tot auer-me pòstgraduat en “Gestion e organizacion culturau”.
Eth potenciau culturau dera Val d’Aran ei indiscotible. Resulte era nòsta mèrca d’identitat, e coma tal a de besonh atencion, un trabalh prigond e ua planificacion estructurada,
entà plaçar ara cultura, en lòc d’importància e de rigor que merite. Eth Conselh Generau d’Aran a d’incentivar
era creacion culturau, a d’amparar as associacions privades, a d’impulsar de forma efectiva er emplec dera lengua entà hèr-la era lengua de toti
e, en definitiva a de definir un modèl culturau pròpri, de toti e entà toti, un modèl en qu’es persones que viuem ena Val d’Aran mos i sentegam identificadi.
Eth nòste equip, damb Paco Boya ath capdauant, compde damb es melhors esturments, es melhors persones e damb eth melhor programa entà qu’eth nòste projècte culturau sigue eth que balhe respòsta as besonhs e mancances culturaus deth nòste país e dera nòsta gent.
Tot e non poder estener-me mès, voi dider-te que reberàs es nòstes prepauses en tòn domicili pendent aguesti dies, tanben pòs consultar-les ena plana www.pacoboya.org.
Totun, demori ara tua disposicion entà comentar o esclarir es dubtes o qüestions que pogues auer respècte ath nòste programa de cultura.
Plan coraument,
Maria Vergés