Eth partit aranés a reclamat en plen deth Conselh Generau d’Aran que non s’amie a tèrme cap accion sense eth consens des pagesi aranesi e a demanat ua accion contundenta des administracions tà garantir era contunhitat dera activitat ramadèra extensiva ena nauta montanha, en tot establir naues linhes de supòrt e ajuda.
En plen deth Conselh Generau d’Aran celebrat ager deluns, Unitat d’Aran a demanat que, deuant dera propòsta deth Ministèri d’Agricultura, Alimentacion e Miei Ambient d’iniciar en Aran ua pròva pilòt tà reintrodusir eth Linx europèu, aguest projècte se hèsque, unicament, se compde damb eth consens des pagesi e es ajuntaments d’Aran.
Unitat d’Aran a lamentat que, tot e qu’es ramadèrs aranesi passen per moments delicadi, entre d’autes rasons per non auer crubat ajudes pendents dera Generalitat e der Estat, atau coma per non auer assignat cap veterinari tà realizar es tràmits que les permeten era venda deth bestiar enes fires, se destinen recorsi tara reintroduccion d’un nau depredador enes montanhes araneses.
En aguest sens UA manifèste era sua preocupacion pera devarada generau deth sector der ovin e a reclamat eth besonh d’establir mesures qu’ajuden a mantier es ramats enes montanhes, tà garantir era biodiversitat e eth contròl deth bòsc, atau coma tà mantier eth paisatge, era qualitat deth quau afècte tanben ath sector toristic e ara gestion territoriau.
UA a criticat era desvinculacion dera gestion ambientau des problèmes dera ramaderia, e a avertit qu’era ramaderia e era preséncia de ramats enes montanhes ei un ben a preservar e a incentivar, per’mor qu’actuaument ja i a en Aran pòbles a on era activitat a despareishut totaument, çò qu’en brèu aurà un impacte negatiu sus era gestion des espacis agraris.