Eth secretari generau d’Unitat d’Aran, Francés Boya, a instat aué ath Conselh Generau e ara Generalitat a que hèsquen efectiu eth traspàs dera competéncia de proteccion civil, d’acòrd damb eth compromís qu’artenheren andús govèrns en 2010 per miei d’un convèni de collaboracion. Boya a hèt arribar era sua propòsta ar equip de govèrn en darrèr plen celebrat ena maxima institucion aranesa.
Er acòrd, signat en octobre de 2010 damb eth Departament d’Interior, a permetut arrefortir, pendent aguest temps, tot eth sistèma de proteccion civil ena Val d’Aran per miei dera incorporacion d’ua tecnica de supòrt basic ena organizacion deth Conselh.
D’aguesta forma, ara s’a podut aprovar un Plan d’assisténcia e supòrt as municipis aranesi entà mielhorar era coordinacion en cas d’emergéncies e dar supòrt as ajuntaments enes sues foncions de proteccion civil.
Francés Boya a declarat que “eth Conselh a era oportunitat de hèr un pas important ena gestion integrau dera proteccion civil en Aran, en tot apregondir e mielhorar er exercici der autogovèrn ena prestacion des servicis basics entàs ciutadans”.