Eth grop d’Unitat d’Aran en Conselh Generau a contribusit ara unitat politica damb era mocion aprovada aué per totes es fòrces contra era peticion de recors deth Govèrn centrau ar “usatge preferent” der aranés, establit ena Lei der occitan, aranés en Aran. Eth pòrtavotz Francés Boya a explicat que “er aranés ei un esturment de coesion deth pòble e exprèsse era nòsta volentat d’èster”.
Era mocion incorpòre era demana d’UA entà qu’er Estat “ajude a protegir er aranés coma lengua cooficiau dera Val d’Aran e de Catalonha e coma part fonamentau deth patrimòni immateriau de tota Espanha”. Totun, Boya a avertit qu’eth tèxte “patís ua mancança”, ja que “eth govèrn de CDA i a volut amagar era responsabilitat deth PP sus era senténcia deth Tribunau Constitucionau contra er Estatut, qu’a provocat era peticion de recors deth Govèrn centrau, d’acòrd damb un dictamen deth Conselh d’Estat”. “Sense era senténcia deth TC ahiscada peth PP, non seríem a on èm”, segontes eth conselhèr.
Francés Boya considère que “de hèt, Convergéncia e eth PP compartissen un hons ideologic e politic, qu’explique era volentat de CDA d’amagar era responsabilitat deth PP en un ahèr tan important coma era preservacion dera lengua pròpria d’Aran”. Eth pòrtavotz a demanat ath sindic e ath conselhèr de Cultura dera Generalitat qu’era comission de seguiment sus eth recors d’inconstitucionalitat sigue “participativa e non privativa des govèrns, perque era Lei der aranés a estat aprovada peth Parlament damb ua ampla majoria politica”.