Er Ajuntament de Vielha e Mijaran crompe eth parcatge dera Tuca.

Er alcalde der Ajuntament de
Vielha e Mijaran, Joan Riu,
manifestèc qu'”eth consistòri
cromparà eth parcatge dera
estacion d’esquí Tuca”. Cau
díder, qu’ara per ara, aguest
parcatge ei embargat per cinc
bancs e sauvat, damb opcion de
crompa, des deth passat mes
d’abriu tar Ajuntament. Atau
madeish, segontes Riu eth
pròplèu dia 17 se celebrarà eth
prumèr plen deth consistòri a on
“se prepausarà ua modificacion
de pressupòst entà poder
abilitar ua partida tad aguesta
crompa e atau aquerir un
compromís de pagament e
resèrva damb es bancs sus aguest
parcatge”.
De ua auta faiçon, Carlos Cánovas
e Eusebio Gómez, proprietaris
deth 50,2% de Tuca, tecnics dera
immobiliària FADESA que les
assessoraràn e Paco Fernández
Ochoa s’amassèren era darrèra
setmana damb es còssos deth
consistòri deth cap-lòc d’Aran. Er
objectiu d’aguesta trobada,
segontes Cánovas, “ei demanar un
sòrta de detalhs dera estacion tà
poder elaborar eth projècte
d’estacion”. Ath delà, Cánovas
higec que “Tuca non poirà
amortizar es sues installacions
sense requalificacions
urbanistiques o ajudes publiques”.
Pera sua part, Riu expliquèc
qu'”eth projècte que presenten
aurà d’èster viable e rentable a
miei tèrme entà Vielha” e higec
qu'”entenem que tanben an d’auer
ues compensacions
urbanistiques, mès an d’èster
equilibrades”. En aguesta
amassada FADESA higec era
possibilitat de bastir en Tuca un
parc tematic, centres termaus e
un camp de gòlf. Entad açò qu’ei
ath judici dera dissolucion dera
societat, segontes Riu, era unenca
possibilitat de paralisar-lo ei que
“totes es fòrces politiques der
Ajuntament veiguen aguest
projècte viable e bon entath
pòble de Vielha”.