Juan Riu met de relèu eth sòn projècte realista e solvent entà Vielha-Mijaran
Era secretària d’Accion Politica d’Unitat d’Aran e candidata numero 3 per Vielha-Mijaran, Maria Vergés, a avalorat eth debat de Lleida Televisió entre es prumèrs candidats entar Ajuntament. Vergés a assegurat que “Juan Riu a metut de relèu era sua solvéncia e eth sòn major coneishement des tèmes qu’afècten ath caplòc aranés”. Per contra, “eth candidat de CDA a mostrat ua vision irreau de Vielha-Mijaran, de véner hum, aluenhada des problèmes reaus dera gent”. “Ei ua frivolitat prométer 200 lòcs de trabalh sense díder coma les vò crear”, a declarat.
Paco Rodríguez Miranda negociarà damb eth Bisbat d’Urgelh er aqueriment deth cine entà Bossòst
Dempús de complir damb es objectius previsti en aguesta legislatura (nau pònt, mielhora de carrèrs, supòrt ath comèrç, eca.), er alcalde de Bossòst e candidat ara reeleccion, Paco Rodríguez Miranda, se propòse negociar damb eth Bisbat d’Urgelh er aqueriment deth cine, proprietat dera diocèsi, entath gaudi deth pòble. Ath delà, er equip d’UA vò convertir eth Parc deth Portilhon, ja lèu finalizat, en un espaci de referéncia entàs activitats de montanha, que suposarà era creacion de lòcs de trabalh. Tanben desvoloparà, un còp signat eth convèni, er hilat de gas entà tota era populacion, damb un totau de 6 quilomètres e 800 mètres.