Unitat d’Aran ei un partit politic progressista e comprometut damb es valors dera democràcia, era libertat, era patz, era tolerància, era conviuença, era justicia sociau e eth respècte as drets umans fonamentaus. Ei per açò que, coma part d’aguest compromís qu’es òmes e hemnes d’UA mantiem damb era nòsta societat, deuant dera terribla catastrofa umanitària que se patís en Gaza pr’amor, era aguest partit declare que:
- Se posicione, sense ambigüetats, en contra de tot acte de violéncia e guèrra, en tot condemnar es violacions des drets umans fonamentaus que patís era populacion civila de Gaza.
- En tot seguir aquerò que prevé era Convencion entara Prevencion e era Sancion deth Delicte de Genocidi, reclame era adopcion urgenta de totes es accions de besonh entara prevencion e càstig dera incitacion dirècte e publica a cométer genocidi e s’impulsen de manèra immediata es accions efectives que permeten era ajuda umanitària en Gaza.
- Exigís ua arturada deth huec en Gaza, immediata e permanenta.
- Reclamam era liberacion immediata e sense condicions des persones ostatges, e reafirmam era importància d’un accès umanitari urgent e efectiu entà ajudar ara populacion civila de Gaza, que patís de forma dramatica es conseqüéncies deth conflicte. Aguest supòrt a d’èster garantit sense cap manipulacion per part de grops terroristes o govèrns.
- Afirmam era nòsta determinacion en cercar ua patz que perdure basada ena sollucion de dus Estats, en tot revitalizar un procès de patz que respècte era dignitat, era seguretat e eth dret a víuer damb libertat tant deth pòble israelian coma deth pòble palestin.
- Cridam ath dialòg, ath respècte d’andús pòbles e ara cooperacion damb es autoritats palestines legitimes, e damb es sòcis dera comunautat internacionau que poguen jogar un ròtle positiu entà esvitar ua escalada qu’encara agrèuge mès eth conflicte.
Eth compromís d’Unitat d’Aran deuant dera barbàrie e era desumanizacion ei clar: umanitat, respècte, solidaritat e principis. E, sustot, ara e tostemp: patz, democràcia e justicia damb es pòbles e damb es persones.