Eth senador e secretari generau d’Unitat d’Aran, Francés Boya, a lamentat aué qu’eth govèrn aranés age suprimit er autrejament des Prèmis 17 de Junh, “es prèmis nacionaus d’Aran votadi pera gent a favor de persones o collectius qu’auien destacat en diuèrsi encastres dera vida sociau deth país”. “Er argument dera austeritat non servís quan s’an recuperat d’auti actes que genèren mès despena, coma eth dinar institucionau”, segontes Boya.
Entà UA, aguesta decision “equivocada” mòstre eth “revengisme” de CDA ena maxima institucion d’autogovèrn damb es accions amiades per anterior executiu. Boya a assegurat que “ei insolit qu’un govèrn autoproclamat nacionalista elimine uns Prèmis que contribuïen a dignificar e hèr mès de toti era hèsta nacionau d’Aran”.
Es Prèmis 17 de Junh, simbolizadi pera protagonista dera legenda dera Maladeta, Blancaflor, neisheren en 2008 damb er objectiu de reconéisher eth trabalh e esfòrç de persones e collectius enes airaus dera cultura, der espòrt, era promocion economica e era accion sociau. Uns prèmis qu’artenheren era implicacion e complicitat dera ciutadania, que damb es sòns vòts decidien as premiadi. Aguesti guerdons s’entregauen era vesilha dera Hèsta d’Aran, amassa damb es prèmis literaris, en Santuari de Santa Maria de Mijaran.