Eth candidat d’Unitat d’Aran tara alcaldia de Vielha e Mijaran, Juan Riu a desgranat aué es sues prepauses en economia e Trabalh entath municipi.
Juan Riu a anonciat que congelarà es impòsti municipaus (IBI, IAE, Impòst de plusvalues e impòst sus es veïculs) coma mesura entà aleugerir era carga fiscau as contribuents entà combàter era crisi economica. Riu a soslinhat que damb aguesta mesura preten “contrarestar era inexplicabla pujada deth 25% der IBI enes dus darrèri ans qu’a amiat a tèrme, en plea crisi, er Ajuntament de Vielha governat per Convergéncia”.
Atau madeish eth candidat d’Unitat d’Aran en Ajuntament de Vielha s’a comprometut a prebotjar plans e escòles ocupacionaus e escòles talhèr en collaboracion damb era Generalitat de Catalonha e eth SOC damb er objectiu de generar ocupacion e fomentar era formacion tant entà adults coma entàs joeni.
Riu a soslinhat que s’arribe a governar utilizarà toti es esturments que siguen ena sua man entà combàter era crisi economica. Pr’amor d’açò compdarà damb era concertacion d’agents sociaus, economics e politics entà acordar mesures de reactivacion economica, impulsarà un Plan de dinamizacion deth comèrç damb era participacion deth sector locau e prebotjarà era entrada der Ajuntament de Vielha ena Fondacion de Torisme entà prebotjar toristicament eth cap-lòc d’Aran.
Entà Riu, “era recèpta entà combàter e superar era crisi economica en Vielha e Mijaran passe entà congelar es impòsti, prebotjar mesures entà generar ocupacion e formacion, dar supòrt as nòstes empreses e comèrci, e concertar politiques economiques damb es agents sociaus e economics deth municipi e d’autes administracions”.