Eth sindic d’Aran e candidat ara reeleccion per UA, Paco Boya, e eth dusau candidat de Castièro e conselhèr de Torisme, Comèrç e Transpòrt, Juan Antonio Serrano, s’an amassat aguesta setmana damb representants deth sector economic, toristic e comerciau dera Val d’Aran. Ena trobada, celebrada en otèl Tuca, Boya e Serrano an dat a conéisher es principaus linhes de trabalh entà potenciar era economia enes pròplèu ans, pr’amor qu’aguest objectiu ei “un des grani èishi de futur entà Unitat d’Aran”, segontes Boya.
Andús candidats apòsten per impulsar eth torisme pendent tot er an. “Mos cau consolidar er iuèrn e potenciar es autes sasons damb era implantacion d’ua infraestructura toristica restacada damb eth torisme familiar e de montanha”, segontes eth sindic, entà qui “ei de besonh passar des 800.000 visitants annaus, concentradi basicament en iuèrn, as mès d’1,5 milions, en tot promòir mès era Val d’Aran coma destinacion de referéncia enes autes sasons”.
Açò vò díder que cau seguir eth camin encetat aguesta legislatura entà internacionalizar era destinacion e desestacionalizar eth torisme per miei de productes coma eth senderisme, era BTT o eth torisme de benèster, qu’ath còp an de poder comercializar-se damb esturments coma era naua Fondacion Val d’Aran, impulsada peth Conselh en mandat actuau.
Juan Antonio Serrano a remercat tanben que “ara cau dar un pas entà dauant entà convertir Aran en ua referéncia comerciau enes sòns encastres d’ifluéncia, pr’amor qu’eth comèrç ei un des sectors mès importants e dinamics dera Val d’Aran”.
