En un acte amiat peth candidat tà Síndic, Paco Boya, eth cap de lista per Pujòlo, Paco Bruna, a presentat eth programa d’Unitat d’Aran de Miei Ambient, eneth quau se prebotge un Plan Estrategic deth Paisatge entà gestionar-lo transversaument coma fondament economic e identitari deth país. “Volem aplicar politiques ambientaus qu’agen coma basa era conservacion der entorn d’acòrd damb es besonhs e mancances dera Val d’Aran”, a declarat Bruna.
Eth candidat de Pujòlo a rebrembat qu’eth paisatge ei un actiu sus eth quau se base bona part deth nòste producte toristic, e qu’aguest ei un aspècte definidor dera nòsta qualitat ambiental. Atau madeish, Bruna a remercat tanben era importància deth sector ramadèr en Aran entara conservacion deth paisatge e des atractius toristics deth país.
Entre es accions que propòse UA, i a era metuda en marcha d’un sistèma de recuelhuda de lordères eficaç e ajustat as critèris de sostenibilitat, e era creacion d’ua Comission especifica formada pes Societats Cinegetiques dera Val d’Aran e eth Conselh Generau d’Aran qu’age coma objectiu fixar es directritz dera cogestion dera Zòna de Caça Controtlada d’Aran.
En çò que tanh ath torisme, eth candidat Juan Antonio Serrano (Castièro), a explicat qu’era determinacion d’UA ei “amiar a tèrme accions qu’afavorisquen era desestacionalizacion deth sector entà assegurar-ne eth mantenement coma motor economic d’Aran”. Serrano a soslinhat que “cau aufrir naui productes e potenciar era creativitat e promocion toristica en tot emplegar es naues tecnologies e modèls de publicitat actuaus”.
En aguest sens, eth candidat de Castièro a anonciat un futur acòrd damb era Secretaria d’Estat tà amiar un plan pilòt que permete era internacionalizacion dera destinacion Aran tà guanyar ua des prumères posicions entre es destinacions europèes de montanha.