Eth Plen a aprovat una mocion de supòrt ath pòble de Catalonha tara celebracion dera consulta deth 9 de noveme en marc dera legalitat vigenta, ath temps que s’a remercat qu’es institucions catalanes agen en compde era veu pròpria d’Aran en aguest procès.
Aguest maitin eth Plen der Ajuntament de Vielha Mijaran aprovaue, en apartat d’ahèrs d’urgéncia presentat per CDA, ua mocion de “Supòrt ath pòble de Catalonha entara celebracion dera consulta deth 9 de noveme sus eth sòn futur politic”.
Era mocion a estat formulada conjuntament pr’amor der acòrd prèvi entre Unitat d’Aran e CDA, en tot includir-i es punts 4 e 5 a propòsta d’UA, qu’incidissen en reconeishement der hèt diferenciau dera Val d’Aran ath temps que remèrquen eth besonh que Catalonha reconeishe eth pròpri dret des aranesi e araneses a decidir eth sòn futur en cas d’ua ipotetica independéncia de Catalonha der Estat Espanhòl e atau “daurir ua naua etapa a favor deth sòn estatus especiau entà garantir eth progrès sociau, eth desvolopament economic, eth refortiment democratic e eth foment dera cultura e lengua pròpries”. Atau madeish, s’a incidit en qu’eth supòrt ad aguesta consulta s’emmèrque laguens des marges democratics e dera legalitat vigenta.
D’aguesta forma, e dempús d’auer estat debatuda e consensuada, era mocion a estat aprovada damb es vòts favorables d’Unitat d’Aran e CDA e eth vòt contrari deth PP.