Eth sindic d’Aran e candidat ara reelecion per UA, Paco Boya, a assegurat aué qu’impulsarà eth Centre d’Innovacion Empresariau dera Val d’Aran, qu’ara bastís eth Conselh en Casau, entà “fomentar eth trabalh, crear naues empreses e ajudar as existentes en Aran”. “Aguest projècte, qu’auem metut en marcha en aguesta legislatura, va adreçat especiaument ara nòsta joenessa e es emprenedors, pr’amor qu’entà UA son ua prioritat”, segontes Boya.
A despièch qu’eth marge d’actuacion deth Conselh e es ajuntaments ei limitat entà revertir eth caumatge, UA s’a comprometut a hèr d’aguest centre un esturment tà acuélher es projèctes empresariaus des joeni e es emprenedors e dar supòrt as empreses que desvolopen era sua activitat en Aran. Eth supòrt s’amiarie a tèrme damb era aplicacion des naues tecnologies e era innovacion enes sòns negòcis.
Boya a auançat qu’eth Conselh Generau se dotarà tanben d’un Espaci entath Foment deth Trabalh, que reforçarà er Airau de Promocion Economica e aufrirà formacion e assessorament personalizat entà trobar trabalh damb era collaboracion estreta deth Servici d’Ocupacion de Catalonha.
CDA frivolize era manca de trabalh
Eth Centre d’Innovacion Empresariau, ena fasa finau de construccion, trobarà era complicitat der Ajuntament de Vielha-Mijaran se Juan Riu deven alcalde. Eth prumèr candidat en caplòc aranés s’a referit ath projècte com “ua oportunitat tà crear trabalh de forma concrèta e tangibla”. Riu a declarat que d’aguesta forma se demòstre que “UA compde damb un projècte realista, que tòque de pès en tèrra”, e a lamentat que “CDA tracte damb frivolitat un ahèr tan sensible coma era manca de trabalh en prométer centenars de lòcs de trabalh sense concretar coma les crearà”.