Jordi Caseny ei eth candidat deth rigor e era transparéncia. Atau se constatèc ager en acte de presentacion des èishi d’actuacion deth programa d’UA-PM-PSC tà Naut Aran, especiament en çò que tanh ath pòble d’Arties.
Er alcaldable afirmèc que non a “interèssi urbanisitics”, en ua clara allusion ath candidat de CDA, César Ruiz, qu’ei gerent dera immobiliària Gestiaran, dera quau ei copropietari er enquia ara alcalde Víctor León. Caseny, foncionari de carrèra, assegurèc qu’era sua prioritat ei èster alcalde de Naut Aran e per aquerò demanarà ua excedéncia se n’ei escuelhut, atau coma manifestèc en tot desmentir es acusacions difondides per CDA que lo desvinculen, se guanhe, dera sua volentat de presidir er Ajuntament.
Era amassada compdèc damb era preséncia des candidats ath Conselh Generau José Antonio Bruna e Emilio Sanllehy peth PRAG e Paco Boya per UA-PSC. Aguest darrèr proclamèc qu’ara ei eth temps des politiques d’atencion as persones en Aran. “Racionalizaram era despena des nauts cargues, que supòsen 900.000 èuros ar an, entà priorizar es politiques sociaus”, argumentèc.