Era candidata per Castièro, Maria Vergés, qu’a presentat eth programa culturau, a declarat qu’UA “vò potenciar un modèl de cultura pròpri, integrador e de qualitat”, pr’amor qu’en país i a ua manca de planificacion e coordinacion qu’afècte ara creacion e ar accés ara produccion.
Maria Vergés a soslinhat qu’ei de besonh “incentivar era produccion culturau e artistica atau coma impolsar un concèpte de lengua utila en ús des mejans de comunicacion, surtot des naues tecnologies”.
Tanben a explicat qu’es punts culturaus se poderàn ubicar enes sales sociaus des Ajuntaments coma lòcs d’accés ara produccion artistica pròpria e importada, e qu’era constitucion deth Conselh dera Cultura e es Arts “suposarà un cambi pregon a partir deth quau s’assegurarà era participacion des persones der àmbit dera cultura ena elaboracion dera politica culturau e d’un finançament desinteressat e imparciau”.