UA encetarà un debat sus er encastre qu’a de besonh era Val
Eth secretari generau d’Unitat d’Aran e conselhèr generau, Francés Boya, a anonciat aué que “Unitat d’Aran vò liderar un debat e ua reflexion pregona sus quin a d’èster eth nau encastre deth país dauant eth procès dera naua Lei d’Aran e era grèu situacion financèra que viu eth Conselh Generau”.
Francés Boya considère que “Aran merite un nau estatus juridic, financèr e institucionau, que mos dongue mès autonomia e refortisque, damb mès democràcia, era identitat aranesa e es institucions pròpries”.
UA assegure que “se Catalonha encète un nau camin, Aran a dret a plantejar tanben un nau scenari d’autogovèrn”. “Auem d’escotar era volentat des aranesi e es sues institucions respècte deth futur que vòlen tà Aran e eth modèl de país que volem bastir entre toti”, en paraules deth senador. Tà UA, ara ei ua bona oportunitat entà amia’c a tèrme.